يوميااااااااات شاب متكتك, ........جامدة.........يوميااااااااات شاب متكتك, ........جامدة.........

امبارح كنت نازل مشوار امبابة رايح لواحد صاحبى كنت بسلمه شغل نزلت عند النفق كدة وبدات ابص حواليا عازما على تنفيذ ما فكرت فيه من لحظة خروجى من البيت وهى انى هاركب توك توك النهاردة حسيت بالظبط نفس احساسى وانا عيل صغير لما كنت بروح ملاهى السندباد(مكانش فيه غيرها زمان) وكنت افضل واقف قدام بيت الرعب محتار اخد القرار اذا كنت ادخل ولا لا مع انى دايما كنت بتراجع لسببين منهم سبب منطقى وهو خوفى من الضلمة والحجات الى جوا والسبب التانى خوفى من الاخ ابو ايد تقيلة الى بيضرب الناس على قفاهم جوا واللى كان حظى دايما بيخلينى اقعد فى الناحية الى بيكون واقف فيها وبشوف من بعيد وهوا مستخبى ومستعد للضرب وبتخيل استمتاعه بالشغلانة دى وهى ضرب الناس على قفاهم وتخويفهم كان نفسى فى مرة العربية الى انا فيها تتعطل وانا قدامه والنور ينور عشان بس اساله اشمعنى القفا ؟ سؤال مازال معلق فى سقف ذكريات الطفولة الى الان بدون اجابة , بدون ان اكلف نفسى عناء البحث لقيت توك توك قدامى صرخت : بصراوى ؟ شاورلى اركب ,الصراحة تتقال الاخ مظبط التوك توك اخر تظبيط ولمبة حمرة وحركات مقدرش عليها المهم طبقت نفسى ووطيت وسميت ودخلت برجلى اليمين ومرت ثوانى من المعاناة لا يعرفها الا اصحاب الطول امثالى عشان يكوروا جسمهم ليلائم الكنبة الخلفية للتوك توك ومفيش مانع ان راسك تكون لازقة فى السقف ورجلك مزنوقة فى كرسى السواق المهم فى الاخر انك استقريت وقعدت , لحظات قبل ركوبى التوك توك كان بيت الرعب هو المكان الاكثر رعب بالنسبة لى لكن الموضوع اتغير تماما بعد ركوب التوك توك , الواد الى كان بيسوق عمره فى حدود 16 سنة وفى اصغر كمان يعتبر دا اكبر واحد فيهم المهم واكتشفت انه عشان تنجح فى اختبارات سواقة التوك توك لازم تكون معندكش قلب ومبتخافش ولا حتى من العفريت دة اكيد الى بتعمله لجنة الاختبارات الخاصة بالتوك توك والا كان لازم يحبسوا السواق دة بتهمة اثارة فزع المواطنين , سلسلة من الغرز الغير مدروسة يمين فى شمال فى يمين ودخول فى مساحات تكفى بالكاد لعبور ايدك وهيا مطبقة والمعجزة هى نجاحه فى الخروج كل مرة ابن الايه وواضح انه من الاحرار اللى ميهمش مطب ولا يقلقهم مزلقان لانى اتنطرت من عالكرسى حوالى 8 مرات وحتى مصعبتش عليه ولا بصلى يتطمن عليا واضح كويس انه فاهم ان مهمته هى انه يفسح الزبون وبصراحة الزبون اتفسح اخر حاجة , من باب الترفية عن الزبون تقدر دايما وانت راكب التوك توك تستمتع بالهوا الى يلطش فى وشك يجيبلك نزلة بردة تقوم منها بعد اسبوع لكن للاسف مفيش رفاهية انك لو عايز تقفل الشباك دة يعنى الموضوع مش اختيارى تماما دة انت لازم تركب التوك توك وانت مدفى صدرك بجرنال تحت هدومك وطبعا لازم تستمتع بسماع احلى الاغانى وانت راكب زى اغنية الشيطان والعبد او اى شريط لجورج وسوف ودة للسواقين الجامدين مش لاى حد صوت صادر عن سماعات تحتل الربع الخلفى من التوك توك يعنى فى ضهرك وانت راكب علطول والصوت على اخره واراهنك لو قدرت تميز كلمتين من الى المطرب بيقولهم ودة طبعا راجع لكفاءة الشريط اولا وقوة السماعات اللى اكيد الهدف منها فقط هو تعكير مزاج الزبون وزى ماقولت قبل كدة انت ملكش اى اختيار لا فى نوعية المادة الصوتية المقدمة ولا ليك اى رأى فى تحديد الوقت اللى تطلب من السواق فيه انه يوطى الكاسيت شوية او يطفيه عشان انت مصدع ونصيحة متطلبش الطلب الاخير دة تحديدا لانه غالبا هيتفهم انه تعدى على حقوقه ومش بعيد يعمل امريكانى وتلاقى نفسك برة التوك توك على ضهرك فى وسط الشارع ,فى مدة 10 دقايق هى فترة الرحلة من النفق وحتى البصراوى وكل تركيزى على كيفية النط من هذا التوك توك فى اول فرصة سانحة من باب من خاف سلم بس بعد تفكير قولت انه احتمالية ان عربية تخبطنى وانا بنط فى الزحمة دى هى احتمال اكبر من اننا نعمل حادثة عشان كدة استحملت لحد ما وصلت وكان هاين عليا انزل عالارض ابوسها اول مانزلت من التوك توك , خطر ببالى ان فيه علاقة بين سواق التوك توك وبين الراجل بتاع بيت الرعب بس حسيت انى ببالغ شوية

دى صور محاولاتى لتصوير السواق والتوك توك من الداخل وطبعا زى ماهوا واضح ان كل المحاولات فشلت بسبب عدم استقرارنا لمدة فمتو ثانية على خط مستقيم بس يمكن الصور توضح شوية معاناة من الى عانيتها يمكن حد مسئول يقرا الموضوع وينزل قرار بازالة التوك توك دة من الوجود

thanks

شكرا

شكراااااااااااااااااا